17 ліпеня падчас сумеснай прэс-канферэнцыі Святлана Ціханоўская, Марыя Калеснікава і Вераніка Цапкала патлумачылі, чаму вырашылі аб’яднаць намаганні, як будзе праходзіць агітацыя і што рабіць кожнаму беларусу 9 жніўня. Сабралі галоўныя тэзісы прэс-канферэнцыі.
Як будуць працаваць тры штабы?
Мы аб’ядналі не штабы, мы аб’ядналі нашыя намаганні. Напярэдадні тры штабы – Віктара Бабарыкі, Святланы Ціханоўскай і Валерыя Цапкалы – сфармулявалі 5 прынцыпаў супрацоўніцтва.
Пяць асноўных прынцыпаў нашай перадвыбарчай кампаніі:
- Мы будзем заклікаць выбаршчыкаў прыйсці на выбары 9 жніўня 2020 года і галасаваць.
- Мы вызвалім палітычных і эканамічных зняволеных, дамо права на перагляд справаў у незалежных і сумленных судах.
- Мы правядзём паўторныя сумленныя выбары пасля 9 жніўня 2020 года.
- Мы будзем інфармаваць выбаршчыкаў аб неабходнасці абараняць свой голас рознымі спосабамі.
- Мы будзем заклікаць удзельнічаць у ініцыятывах за сумленныя выбары: «Сумленныя людзі», «Права выбару», «Рух Праўда» ды інш., станавіцца назіральнікамі.
Заклікаць у момант галасавання выкарыстоўваць механізмы, якія будуць прапанаваныя, для фіксацыі свайго голасу і яўкі.
Усе кандыдаты, якія цяпер удзельнічаюць у выбарчай гонцы, могуць далучыцца і падтрымаць нас, каб дасягнуць нашую галоўную мэту – змену ўлады ў краіне. Напрыклад, Андрэй Дзмітрыеў ужо падтрымаў ініцыятыву аб аб’яднанні. Мы адкрытыя да дыялогу. Мы таксама спадзяёмся на падтрымку кожнага беларуса. І мы ведаем – з намі большасць!
Разам з тым наш штаб будзе працягваць спробы зарэгістраваць Віктара Бабарыку кандыдатам у прэзідэнты. На бягучы момант усе нашыя звароты і скаргі не прынеслі станоўчых вынікаў, але мы не хочам губляць час, і прынялі рашэнне ісці наперад. Калі Віктара Бабарыку ўсё ж зарэгіструюць, то мы працягнем супрацоўнічаць у рамках прынятых 5 прынцыпаў. Пра тое, што нам варта аб’ядноўвацца дзеля галоўнай мэты, Віктар Бабарыка казаў з самага пачатку.
Ці будзе агітацыя?
Так, мы будзем дапамагаць Святлане Ціханоўскай. Агітацыйныя пікеты будуць адбывацца ва ўсіх абласных гарадах, а таксама ў раённых цэнтрах. Нагадаем, кожны грамадзянін Беларусі мае права агітаваць і распаўсюджваць інфармацыю сярод знаёмых, калег, сяброў.
Што рабіць 9 жніўня?
Нашая мэта – актывізаваць грамадзян для выражэння сваёй грамадзянскай пазіцыі 9 жніўня на выбарчых участках. Кожны грамадзянін Беларусі вырашае, як яму абараняць свой голас.
Як забяспечыць сумленныя выбары?
1. Нашая галоўная задача на гэты момант – забяспечыць кожны выбарчы ўчастак дастатковай колькасцю назіральнікаў. Для гэтага мы заклікаем беларусаў далучыцца да ініцыятываў па назіранні за выбарамі – «Сумленныя людзі», «Права выбару», «Рух Праўда» ды інш., станавіцца назіральнікамі.
2. Таксама мы прапануем выбаршчыкам механізмы, якія дапамогуць зафіксаваць свой голас і яўку.
3. Мы будзем заклікаць сяброў выбарчых камісій не парушаць заканадаўства і адмовіцца ад фальсіфікацыі вынікаў выбараў.
Калі нас будзе 3,5 мільёны – электаральная большасць – сфальсіфікаваць выбары будзе немагчыма.
Тры цытаты
Марыя Калеснікава: «Самае неабходнае для нас цяпер – гэта грамадская падтрымка. Мы просім беларусаў аб’яднаць намаганні паміж сабой і з намі і актыўна працаваць. Галоўны вораг нашай перамогі – гэта не рэжым, гэта думка «усё роўна нічога не зменіцца». Яе трэба замяніць на «я магу ўсё змяніць». Лепш цяпер зрабіць усё магчымае, чым, седзячы на канапе пад аркестр «Славянскага базару», развітвацца са сваімі апошнімі надзеямі на жыццё ў вольнай краіне. Уявіце, як мы ўсе будзем ганарыцца сабой, як будзем расказваць дзецям, што зрабілі галоўную справу ў жыцці – вызвалілі сябе і сваю краіну. Мы ўсе розныя, але што ў нас агульнае – гэта фундаментальная патрэба ў свабодзе, дабрабыце, павазе з боку дзяржавы. Мы кожны дзень заклікаем усіх беларусаў пачынаць працаваць над агульнай перамогай».
Святлана Ціханоўская: «Аб’яднацца было слушным рашэннем. Так мы сталі яшчэ мацнейшыя. Мы не робім нічога дрэннага і незаконнага, мы проста хочам спакойнага і годнага жыцця, а цяперашняй ўлады больш не хочам. Як і большасць. Я ўдзячная падтрымцы ад беларусаў. Нам вельмі патрэбная вашая дапамога, мы ўсе ў тым становішчы, калі толькі разам у нас атрымаецца».
Вераніка Цапкала: «Улада бессаромна зняла з выбараў самых моцных гульцоў. Мы вырашылі аб’яднацца і паказаць, што такое жаночая салідарнасць. Мы ўсім хочам паказаць, што Канстытуцыя – для жанчын, мы не другі гатунак, мы нароўні з мужчынамі і мы пераможам ».